नेपालमा भेटियेका अल कायदा हरु को हून त ?

Debaraj Luitel
सर्वशक्तिमान भन्ने अमेरिकालाई समेत आच्छु आच्छु पार्ने आतंकवादी संगठन अलकायदाको नाम जोडिएर कैलालीमा केही नेपाली पक्राउ परेको खबर आएपछि नेपालको सुरक्षा निकाय लगायत सर्वसाधारण पनि झस्केका थिए। अब विश्वव्यापी सञ्जाल रहेको अल कायदा नेपालमा पनि छिर्‍यो भन्ने चिन्ता उत्पन्न भएको थियो।
आखिर के रहेछ त वास्तविकता ? प्रहरी अनुसन्धानले के देखाएको रहेछ त ?चन्दा सङ्कलन गर्ने योजना बनाएको अवस्थामा कैलालीमा पक्राउ परेका व्यक्तिहरुको अलकायदासँग कुनै सम्बन्ध नरहेको प्रहरी अनुसन्धानले देखाएको छ।
यसो सोच्दा पनि थाहा हुन्छ नि, अल कायदाजस्तो विश्व सञ्जाल भएको संगठनलाई कैलालीका केही काठका ठेकेदार र इँटाभट्टा सञ्चालकसँग चन्दा माग्नुपर्ने स्थिति छ र ? तर यी नेपाली अल कायदाले त चन्दा माग्दै पत्र काटेका रहेछन्।
जिल्ला प्रहरी कार्यालयका प्रमुख प्रहरी उपरीक्षक उत्तम सिंहले अनुसन्धानबाट उनीहरु अलकायदामा आबद्ध नरहेको पाइएको बताएका छन्। किन उनीहरुले अल कायदाको नाम प्रयोग गरेछन् त ?
‘लुटेर खाने मनसायले’ सिंहको कथन छ।
आवश्यक छानबिन र अनुसन्धानपछि उनीहरु उक्त सङ्गठनसँग आबद्ध नरहेको पाइएपछि दुई जनालाई प्रत्येकलाई रु.२८ हजार र अन्य तीनजनालाई दुई दुई हजार रुपैयाँ धरौटी लिई रिहा गरिसकिएको रहेछ।
कैलालीको छुट्टाछुट्टै ठाउँबाट केही हप्ताअघि अलकायदा सङ्गठनमा रहेको आशङ्कामा प्रहरीले पहलमानपुरका शेरा चौधरी र रोशन चौधरी, टीकापुरका सुहाग चौधरी, रामशिखरझालाका रोहित चौधरी र जयलाल चौधरीलाई पक्राउ गरेको थियो।
पक्राउपछि सार्वजनिक अपराध ऐनअर्न्तर्गत यी व्यक्तिमाथि कारबाही अघि बढाइएको थियो। यीमध्ये शेरा, रोशन र सुहाग चौधरी चाहिँ पहिले माओवादीका कार्यकर्ता रहेको प्रहरीले बताएको छ।
स्रोत: मेरोसंसार डट कम