धेरै लेख्न मन लाग्छ, फुटबलका गोलको वर्षाले राष्ट्रिय गौरव बढाएका गाथाहरु। एक से एक स्टार फुटबलरहरुको बारेमा कोर्ने रहर त कहिल्यै मरेन। गोल-गोल र गोलैगोलको खबर लेख्ने रहर अधुरो अपुरो भएको छ। तर यसपटक गोलभित्रको भद्रगोल र बबालबारे कलम चलाउन मन लाग्यो।
प्रसंग अखिल नेपाल फुटबल संघ (एन्फा) को आउँदो भदौ २४ मा हुने निर्वाचन हो। अचम्म ! चौथो कार्यकालका लागि अध्यक्षमा फेरि गणेश थापा नै निर्वाचित भए। बडा अचम्म गणेशविरुद्ध उम्मेदवारी दिने चरो-मुसो कोही देखा परेन। मै लडेर देखाइदिन्छु भन्ने गीता राणाको सबै सपना उडाइदियो संघको संशोधित भनिएको विधानका दफा-उपदफाले। प्रतिस्पर्धी नै नभएपछिको जीतले मख्ख छ गणेश। यो गणेश जीत प्रक्रिया देख्दा सम्झना आयो- भगवान् गणेश र कुमारको सिनियारिटी दौडको।
सुने अनुसार पृथ्वी लोकमा शिव र कुमारमध्ये पहिले कसको पूजा हुने भनेर विवाद भा’थ्यो रे। कुमार र गणेश झगडा भगवान शिव-पार्वती समक्ष पुग्यो। अनि शिव-पार्वतीले तिमीहरु दुवै सुमेरु पर्वत जो छिटो घुमेर आउँछौं, उसैको पूजा पहिले हुन्छ भनेर भन्दिएथे। विचरा भूँडे, सुढे गणेशले मुसा बाहनबाट सुमेरु पर्वत घुम्नपर्ने चुनौती। उता वायुपंखी मयुर बाहनबाट सुमेरु पर्वत घुम्न के बेर लाग्थ्यो र कुमारलाई ?
अन्ततः कुमार छिटो भए सुमेरु पर्वत तीन फन्को मार्न। गणेशले फुन्को मार्न सम्भवै थिएन। त्यसैले जुक्ति सुझाए रे मुसो चढेर बा, आमा या ने कि शिव पार्वतीको तीन फन्को मारेर पहिलो भएथे रे। पछि जितको ढुक्कमा रहेका कुमार हिस्सिए किनकि शिव पार्वतीले गणेश नै पहिलो भएको बताए। कारण दिए सबै लोकका परमाधिपति शिव पार्वतीको फन्को मारेपछि सुमेरु घुम्नै पर्दैन। गणेश पहिलो पुज्य भगवान कुमार दोस्रोको दोस्रो। खेल खत्तम।
यस्तै भो एन्फाको यसपटकको चुनावमा। गणेशले फिफा र एएफसीको दिमाग भुटेका मात्रै छैन त्यहाँभित्रका डिजाइनरहरुको गोट्टी बनेर स्वार्थ पूरा गर्न बितेका १४ वर्षा ज्यानै दिएका छन्। एन्फा आफ्नो खल्तीबाट चलाएरै भए पनि फिफा र एएफसीको सहयोग पारदर्शी नबनाई विरोधी जतिलाई त्यही पैसाको आडमा किनेका छन्। एन्फा सदस्य ७२ मध्ये ६८ ले मात्रै गणेशाय नमः किन गरे ? बिना द्रव्यलाभ, गणेशको फुटबलक्रान्तिबाट नतमस्तक भएर हो र ? कदापि हैन। हो त अध्यक्षमा उही खाओस्, आफ्नो खल्ती पनि मोटाउनोस् भन्ने दरिद्र मानसिकता हो।
एमालेलाई किने, खल्ती भरिदिंदै जीवनराम श्रेष्ठलाई भावी मेयर उम्मेदवारीमा सघाउने शर्तमा। कांग्रेसलाई किने २-४ जनालाई एन्फामा राखेर। माओवादीलाई किने- अरुभन्दा मै बढी कामलाग्दो छु भनेर। आखिर दाजु कमलका लागि नागर्जुन दरबार भए पनि मेरा लागि माओवादी नै दरबार भनेर। सायद वर्षान पुनले चढ्ने बोलेरोमा फिफा र एएफसी सहयोगको हिस्सा हुनुको परिणाम हो यो। बाँकी सब बेबकुफ दल हुन् तिनीलाई गच्छेअनुसार रिझाउन किन चुक्थे र चतुर गणेश। आखिर गणेशले गणेशपथमै जिते।यता गीता परिन् काँचो रिसवाली। सरकारी एन्फाको अध्यक्ष र महिला फुटबल अध्यक्ष हुँदा उनले एन्फा बुझिन। अनि हर्ताकर्ता हुन खोजिन्। तर राजनीति र कुटनीति मिलाउन जानिनन्। लोभी थिइन् भने त गणेशकै उपाध्यक्ष वा महासचिवमा जित्थिन्। तर लोभ गरिनन्। सलाम गर्नुपर्छ एक्लो वृहस्पति बनेरै भए पनि गणेशविरुद्ध हुक्का गर्ने गीता साहसलाई। उनले एन्फाको संशोधित भनिएको विधानको तगारो सुरुमै सच्याउन सकिनन्। भन्नोस् साधारणसभाका सदस्य प्रस्तावक, र्समर्थक हुन नपाउने एन्फाका पदाधिकारी मात्रै प्रस्तावक/समर्थक हुने विधान पनि कहीँ कहिल्यै प्रजातान्त्रिक विधान हुन्छ ?